NESSIE ¿FICCIÓN OU REALIDADE?

Aló polo 1934, aparece a foto dun monstro no Lago Ness en Escocia. Séculos atrás xa se coñecía a "existencia" desa besta e diversas testemuñas ao longo dos anos fixo medrar a lenda. Todo resultou ser un engano... Queres saber que pasou...? Cal foi a trampa...? Quen o preparou todo ...? Preme na imaxe.

Vista do Lago Ness (Irlanda)


Se vos gustou, podedes visitar esta páxina e tamén estoutra. Pasádeo ben!!!

AS MULLERES AO LONGO DA HISTORIA

Tira cómica de La Voz de Galicia

A semana pasada, o día 8 de marzo, foi o día da Muller Traballadora e dende o cole fixemos un montón de actividades.

• Participamos no concurso anual de viñetas do CIM de Bueu. Os rapaces e rapazas de 5º e 6º tivemos que diseñar unha viñeta ilustrativa referente ao lema "A igualdade no traballo". Unha das nosas compañeiras, Isaura Framil, conseguiu unha mención especial. Noraboa a ela e a todos os que participamos!!!
• O 24 de marzo foi o día de Rosalía de Castro e estivemos lendo e comentando algúns dos seus poemas e investigamos un pouquiño sobre ela.
• Ademais, propuxéronnos facer un mural sobre mulleres importantes ao longo de toda a historia para expoñelos despois no cole. Os traballos quedaron estupendos! Cada un de nós escolleu unha muller que nos pareceu relevante nun ámbito de traballo e investigamos sobre ela. Apareceron nomes como Cleopatra, Margaret Thatcher, Clara Campoamor, Marie Curie, Victoria Kent ou a Madre Teresa de Calcuta.

Se queres ver os nosos traballos, preme na imaxe.

A IDADE DE PEDRA

O noso conserxe Ramón, afeccionado á Historia, amosounos esta interesante noticia no diario ABC. Segundo a noticia, atopáronse uns obxectos en distintos puntos de América similares aos atopados nunha cova de Asturias. Puideron ser uns "españois" os primeiros moradores de América? Preme na imaxe se che apetece saber máis.

ROBIN HOOD

Esta mañá, os rapaces e rapazas de 3º, 4º, 5º e 6º tivemos a sorte de ir ao teatro a Vigo. Fomos ver unha adaptación da obra de teatro en inglés sobre o famoso Robin Hood. Os actores eran estupendos e a parte de cantar e motivarnos a participar, ao final puidemos facerlles preguntas, iso si, en english!

"Robin de Locksley volve á casa tras anos de ausencia e atopa todo moi cambiado, excepto a súa amiga da infancia, Marian. Para combatir a crueldade e ambición do sheriff de Nottingham, unirase a un grupo de foraxidos..."
Sóavos de algo? Aquí vos deixamos algunhas imaxes do espectáculo.

ANA ALONSO VISITA A NOSA ESCOLA

O GUSTO DE LER, A NECESIDADE DE
ESCRIBIR E O DESEXO DE CONTAR HISTORIAS

Hoxe estamos de estrea!

E que mellor para comezar a nosa andaina, que a ilusión de coñecer a quen nos fai vibrar coas súas historias? A escritora Ana Alonso regalounos os oídos coas súas palabras.
Un pai amante da lectura, unha casa chea de libros e o gusto por viaxar sementaron nela o desexo de ler e a necesidade de escribir.

Desde ben cedo, compoñía poemas e inventaba historias que co devir dos anos foron enchendo un caixón de textos inéditos.

Aos dezanove anos, sendo estudante de Bioloxía, presentouse a un concurso de poesía que gañou e cuxo premio supuxo a primeira publicación oficial dunha obra súa. Tras este, habían chegar oito premios máis.

Tempo despois, coñeceu a JAVIER PELEGRÍN, compañeiro de viaxe na súa vida profesional e persoal. Xuntos escribiron, entre outros, LA TORRE Y LA ISLA, primeiro libro da colección de ficción científica titulada LA LLAVE DEL TIEMPO.

Esta emocionante novela que estamos a ler en 6º, comeza no ano 2121 e conta a historia de cinco adolescentes que deben superar incribles adversidades, a fin de cumprir unha misión de vital importancia para a humanidade e o seu futuro.

En 5º lemos VERSOS PIRATAS, PIRATAS EN VERSO; un divertido libro no que ademais de gozar co enxeño da pluma de Ana Alonso, aprendemos as máis variadas cuestións relacionadas con estes navegantes, estrafalarios ou elegantes, reais ou de ficción, da vella Europa ou do Caribe, que sucaban os mares procurando tesouros e vivindo aventuras inverosímiles.

Nós contámoslle a Ana Alonso, que os seus poemas nos serviron de inspiración para aprender a xogar coas palabras e navegar nos mares da poesía con lapis de principiantes.
Ela, moi xenerosamente, convidounos a enviarllos por correo electrónico. Así o faremos. Palabra de poeta! (Debemos aclarar que pensamos en poñer “Palabra de pirata!”; pero, igual resultaba pouco de fiar…)
Tamén tivemos oportunidade de falar sobre EL ACERTIJO DE LA VIDA, outro dos seus libros (pertencente á colección PIZCA DE SAL) no que a través dunha ESCOLA DE PIRATAS moi peculiar aprendemos a ver a Natureza desde punto de vista diferente.
GRAZAS POLO TEU TEMPO, POLOS TEUS LIBROS E POR ENCHER O NOSO COFRE DE TESOUROS!