lunes, octubre 01, 2018

ECOPARQUE MARÍN


A NOSA PRIMEIRA EXCURSIÓN:
ECOPARQUE DE MARÍN

Este ano comezamos o curso cunha saída moi "aventureira", na que gozamos moito.
Aquí tedes unha mostra do ben que o pasamos.









lunes, septiembre 24, 2018

BENVIDOS AO NOVO CURSO



BENVIDOS!

Xa á volta das vacacións, agardábanos un comezo interesante.

Dimos á benvida ao novo curso 2018-2019 participando no Festival de Curtametraxes de Bueu (FIC).
Agardamos que sexa un ano moi bo para todos.





jueves, junio 28, 2018

A NOSA VILA: BUEU TEN MOITO QUE OFRECER




O alumnado de sexto estivo traballando ao longo deste terceiro trimestre nun proxecto sobre Bueu.
Partimos da busca de información  en diferentes fontes como páxinas web, folletos publicitarios, libros, revistas, e incluso algunha entrevista .
 Despois destas primeiras pescudas, organizámonos en grupos de expertos , poñendo así en práctica o traballo cooperativo.  Fixemos unha selección de toda a información e posterior tratamento e redacción.
Unha vez finalizada esta primeira fase, iniciamos o proceso de elaboración do vídeo no que queriamos dar a coñecer un pouco máis a nosa vila, e todo o que nos ofrece.

Porque: "Bueu ten moito que ofrecer".

Desexamos que gocedes do noso produto final.

martes, junio 19, 2018


CUADRANGULAR DE BELUSO

Un ano máis o CEIP de Montemogos, convidounos a celebrar a súa Semana Cultural cun cuadrangular de fútbol. E así foi como o venres 25, tan pronto chegamos ao colexio, saímos cara a Beluso todos nerviosos, un grupo formado por  tres nenos, tres nenas e un porteiro en representación do noso colexio. Nada máis chegar coñecemos aos rapaces dos outros centros: CEIP de Cela, CEIP de Montemogos e o da Colexio d Virxen Milagrosa




Os primeiros en xogar fomos  nós, cos anfitrións e resolvemos bastante ben a pesar de que non tiñamos todas con nós, porque eles partían como claros favoritos. A continuación xogaron os da Virxen Milagrosa con Cela. Logo novamente Cela con Montemogos. Despois Virxen Milagrosa con A Pedra nun partido moi reñido. Posteriormente Montemogos con  Virxen Milagrosa, o que nos permitiu descansar un pouco e coller folgos. Finalmente, para rematar a xornada, xogamos contra  Cela.



Cando acabamos todos os partidos, convidáronnos a uns boliños de leite, que nos souberon a gloria coa “lareca” que tiñamos despois de tanto correr detrás do balón. Foi unha mañá intensa e con moitos nervios, pero ao final pagou a pena. Gozámolo un montón. 

GRAZAS ao CEIP de Montemogos polo súa invitación

Deixámosvos algunhas fotos para que vexades o ben que o pasamos. 










lunes, junio 11, 2018

Por qué vai máis calor no verán se a Terra está máis lonxe do Sol?



Aínda que nun principio poida sonar contraditorio, a Terra atópase máis lonxe do Sol no verán que no inverno. Falamos, iso si, do verán e do inverno no hemisferio norte. Agora ben, como é posible isto se o Sol é a gran fonte de calor do planeta azul?.
Para responder a esa pregunta, os nenos e nenas de 5º de primaria, levamos a cabo, ao longo deste curso escolar, un novo traballo para o proxecto das METEOESCOLAS. Puxémoslle por título: A influencia dos raios solares na Terra
Para poder saber como inciden os raios do Sol no noso planeta, medimos todos os martes do curso escolar que nos foi posible, ás 12,30 da mañá, a sombra que producía un dos paus da portería de balonmán que temos no patio do recreo do colexio e anotamos os datos nunha táboa. Comezamos a tomar nota destas medicións o 19 de setembro. Estas son as medidas que obtivemos e a gráfica que realizamos con elas para observalos mellor:

















No mes de maio, xa con moitos datos das sombras acumulados, buscamos información que tiña que ver co que queriamos investigar:
1.-Órbita da Terra arredor do Sol. Observamos que é unha órbita elíptica, e destacamos o perihelio (menor distancia do Sol, ocorre nos primeiros días do mes de xaneiro, inverno no hemisferio norte ) e o afelio (maior distancia do Sol, coincide cos primeiros días do mes de xullo, verán no hemisferio norte) . Pero, como explicamos que cando o Sol está máis lonxe da Terra e precisamente no verán cando máis calor recibe?

2.- Movemento de rotación da Terra e o seu eixe de rotación inclinado 23,5º.

3.- Solsticios: momento no que os raios do Sol inciden perpendicularmente ou no Trópico de Cáncer ( coincide co verán no hemisferio norte) ou no Trópico de Capricornio (coincide co inverno no hemisferio norte). Isto fai que se produza a noite máis longa e o día máis curto (solsticio de inverno) ou o día máis longo e a noite máis curta (solsticio de verán)

4.- Equinoccios, momento no que os raios solares inciden perpendicularmente sobre o ecuador terrestre. Neste momento o día e a noite teñen a mesma duración.  

Con toda esta información, repartimos por equipos o traballo para realizar un mural no taboleiro da clase e así poder observar todos os datos con maior claridade. A un lado , colocamos unha lenda coa información relativa a cada un dos elementos estudados; mentres que no centro, debuxamos a órbita elíptica que realiza a Terra cando xira arredor do Sol; colocamos o perihelio, distancia máis curta entre o noso planeta e a nosa estrela; e o afelio, distancia máis longa entre a Terra e o Sol. Ademais, engadimos letreiros cos meses do ano repartidos ao longo  da órbita elíptica e, ao seu carón, as datas de de observación da sombra e a súa medida. Tamén situamos as estacións do ano e démonos conta de que  non se producen de forma simultánea en todos os lugares do planeta. 


Mural 5ºA

A continuación, cos datos das sombras elaboramos un diagrama de barras, no que sinalamos:
- As estacións do ano. 
- os equinoccios de primavera e outono
- O solsticio de inverno



Mural 5ºB


Analizamos a gráfica con atención e observamos que:
- Dende a primeira medida, o 19 de setembro, a sombra foi medrando ata chegar a data máis próxima ao solsticio de inverno ,19 de decembro. A partir dese punto, a sombra empezou a minguar .
- As datas máis próximas aos equinoccios, 19 de setembro e 20 de marzo, presentan unha sombra de dimensións moi similares.
 - A partir de aquí tratamos de saber cal sería o momento do ano no que a sombra ía ser máis curta. Despois de examinar os datos con atención, cremos que vai ser no solsticio de verán; momento a partir do cal, a sombra comezará a medrar ata chegar ao solsticio de inverno e repeti outra vez o mesmo camiño.


- O eixe de rotación da Terra está inclinado entre 22 e 24 graos dando lugar ás estacións e por iso o Sol non quenta por igual todos os lugares da Terra. Isto dá lugar ás distintas zonas climáticas da Terra: cálida, temperada e fría.


Na Terra notamos máis calor cando os raios do Sol caen de forma perpendicular; razón pola cal, a sombra proxectada é máis pequena. Este feito no hemisferio norte coincide co verán, aínda que neste período a Terra se atopa máis lonxe do Sol que no inverno.
 Para concluír o traballos os nenos e nenas realizaron un traballo por equipos ordenando toda a información e facendo unha exposición oral ao resto dos seus compañeiros.
De seguido presentamos algúns dos traballos realizados polos distintos equipos das dúas aulas de 5º de primaria.









viernes, marzo 16, 2018

VIDEOCONFERENCIA COA ANTÁRTIDA


Este martes tivemos a oportunidade de contactar coa base militar Gabriel de Castilla, na Antártida.


Unha experiencia única e inolvidable, na que puidemos aprender sobre a vida nesa zona do planeta, e sobre os proxectos de investigación que alí están a levar a cabo.



Como somos moi curiosos, fixemos unha gran cantidade de preguntas, moitas en torno aos nosos proxectos do cole: a metereoloxía, a alimentación ,etc.






Ao final da videoconferencia, puidemos ver en directo os alrededores da base.

Gozamos moito desta experiencia!







viernes, marzo 09, 2018

METEOESCOLAS 2017-18

Xa estamos no mes de febreiro e chegounos a quenda de recollida de datos na nosa estación meteorolóxica. Este ano xa somos expertos, coñecemos o nome dos instrumentos meteorolóxicos que temos no cole e as magnitudes que miden. Durante 15 días á hora de entrar, pousamos as mochilas e imos ver a nosa garita. Observamos a temperatura máxima do día anterior e a mínima do actual así como a temperatura que hai nese momento. A continuación medimos a auga da chuvia que contén o pluviómetro se é o caso. Dirixímonos a entrada do cole para colocar os datos no taboleiro do proxecto Meteoescolas,  actualizamos os datos do día, mes, temperatura máxima e mínima pluviosidade e a fase na que se atopa o noso satélite, a Lúa Tamén tomamos nota da información que nos proporciona o barómetro e o higrómetro. Deste xeito toda a comunidade educativa pode estar informado do tempo "Made in Bueu"



Mentres isto ocorría. cos datos meteorolóxicos recollidos no noso colexio no mes de xaneiro de 2018 elaboramos unha gráfica que representaba nas barras as precipitacións recollidas e nas liñas vermellas que unen os puntos as temperaturas máximas e en cor azul as temperaturas mínimas.



O estudo da gráfica serviunos para comparar os datos recollidos cos datos que
correspondían coas temperaturas e precipitacións propias do noso clima. Concluímos que no mes de xaneiro as temperaturas máximas foron máis altas do que sería normal para o clima oceánico de Galicia e as precipitacións inferiores as que se debían esperar.